Tá sé fógraithe ag Éamon Ó Cuív, T.D., An
tAire Gnóthaí Pobail, Tuaithe agus Gaeltachta inniu, go bhfuil deontas €69,000
in aghaidh na bliana, thar tréimhse trí bliana ceadaithe aige don Togra
Oideachais Ghaeltachta Muintearas chun clár
cuimsitheach a reáchtáil ina gcuirfear comhairle, treoir agus tacaíocht ar fáil
do thuismitheoirí i nGaeltacht Chonamara maidir le sealbhú na Gaeilge, dóibh
féin agus dá gcomhluadar Bhí clár cosúil darbh ainm "Ar Leac an Teallaigh" á reáchtáil ag Muintearas
sna hochtóidí, a bhí dírithe ar thuismitheoirí páistí óga réamhscoile. Faoin gclár "Ar Leac an Teallaigh",
tugadh cuairteanna rialta ar theaghlaigh, ina raibh gasúir réamhscoile.
Tá an deontas is deireanaí seo ceadaithe
chun clár píolóiteach trí bliana a reáchtáil - "Ar Leac an Teallaigh go Barr
a'Bhaile" - lena gcuirfear réimse leathan gníomhaíochtaí ar siúl, chomh maith
leis na cuairteanna baile. Ina
measc beidh ceardlanna, léachtaí agus cainteanna, teacht le céile, spraoi, foghlaim,
imeachtaí cultúrtha/ealaíne, dianchúrsaí Gaeilge, seirbhísí comhairleacha,
grúpaí páistí/tuismitheoirí agus seirbhísí cúram iarscoile. Mar chuid den chlár freisin, beidh
Muintearas ag déanamh forbairt ar ábhair thacaíochta agus foilseacháin agus
beidh taighde leanúnach ar siúl de réir mar atá an scéim phíolóiteach ag dul ar
aghaidh.
"Tá taithí na blianta ag Muintearas ag
plé leis an réimse seo," a dúirt an tAire, "agus
leis an gclár seo, tá tús curtha le pleanáil teanga sa Ghaeltacht. Beidh na gníomhaíochtaí faoin
gclár seo lárnach in aon phlean straitéiseach teanga agus go háirithe i
seachadadh na Gaeilge ó ghlúin go glúin. "
R-phost: eolas@pobail.ie Gréasán: www.pobail.ie