Is cosúil an-leisce a bheith ar go leor feidhmeannach sa tSeirbhís Phoiblí cothrom na Féinne a thabhairt don Ghaeilge agus do lucht a labhartha gan trácht ar chaitheamh léi mar is cuí don teanga náisiúnta agus Príomhtheanga oifigiúil an Stáit. Sin an méid a bhí le tabhairt faoi deara ag Conradh na Gaeilge maidir le tuarascáil bhliantúil an Choimisinéara Teanga a seoladh inné, Dé Luain, 2 Aibreán. Is cosúil go bhfuil an meoin seo ag bord an Rialtais go fiú agus é leagtha amach ag an Aire Comhshaoil go n-aislitreofaí chuig an leagan gibiris Bhéarla seoladh a cláraítear sa bhunleagan Gaeilge ar chlár na vótóirí sa chás go bhfuil an seoladh sin taobh amuigh den Ghaeltacht oifigiúil.

Dúirt Dáithí Mac Cárthaigh, Uachtarán Chonradh na Gaeilge: 'Seo cur isteach as cuimse ar chearta teanga an duine aonair, ar chearta an duine é/í féin a chur in iúl agus ar chearta an duine saol príobháideach a bheith aige/aici. Léiriú eile ar an drochmheon seo is ea an mhoill a chuir an Roinn Oideachais ar leagan Gaeilge de na treoirlínte um chosaint leanaí a fhoilsiú. 'Seo ar fad in ainneoin Acht na dTeangacha Oifigiúla agus in ainneoin Airteagal 8 den Bhunreacht. Is í fírinne gharbh an scéil nach bhfaigheann ach an té a bhíonn sásta dul i mbearna baoil na dlíthíochta Ardchúirte deis ar a chearta teanga a shuíomh, faraor.'